مشيت للقباضة نسكّر في باتيندا
شديت الصف، وصلت للڨيشي مدلي ورقة وقالي اعمللها تعريف بالإمضاء
مشيت للبلدية وقصيت نومرو وبقيت نستنّى بعد ساعة وصل نومرويا مديت الورقة للعون قالي المطبوعة ناقصة تمبري
قلت منين التمبري؟
قالي مالقباضة
عاودت رجعت للقباضة وعاودت و قفت في الصف يجي نص ساعة
شريت التمبري و شديت الرحال للبلدية،
وصلت وعاودت قصيت نومرو وقعدت ساعة اخرى نستنى خاطر فما كان ڨيشي برك يخدم وثلاثة مسكرين،
صححت الورقة ورجعت للقباضة عاودت شديت الصف وبعد ما وصلت للڨيشي مديتلو الورقة
مدّلي زوز مطبوعات اخرين كيف بعضهم،
قالي تشري زوز تنابر مالكاسة و صب ورقة في بيرو القابض عاليمين وورقة في بيرو القابض عاليسار
شديت الصف عالكاسة و بعد شديت صف اخر مرتين، مرة عاليمين ومرّة عاليسار وبعد عاودت شديت الصف عالڨيشي قتلو راني صبيت المطبوعات
قالي هز توة الورقة واعملي تعريف بالإمضاء!
قتلو كنت في البلدية راني علاش ما عطيتنيش مع بعضو؟ قالي هاكي الإجراءات،
هزيت روحي ومشيت للبلدية عاودت قصيت نومرو و بقيت نستنى
وصل دوري، مديتلو الورقة
قالي وين التمبري قتلو اما تمبري؟
قالي متع خمسة لاف ،
قتلو توة كنت في القباضة وما قاليش
قالي هاني قتلك انا عاود ارجع للقباضة،
هيا قريت دعاء السفر وعاودت شديت الرحال وهزيت روحي للقباضة لقيتها سكّرت..!!